حلمي عجوز .. يجوز
بس أكيد إني أبيه
مات فيه الأمل .. يمكن
بس أكيد لو ما يجيني .. إني بجيه
تذكرين يوم إنك تسألين .. وش تبي فيه ؟
سكت .. وخطيت على صدر الرمل .. خطوط
ما لها معنى .. يمكن رموز
أو طلاسم سحر .. أو بيتٍ من شعر
أو وهم أحس به يسمعنا
حلمي عجوز .. يجوز
بس أكيد .. يجيله يوم ويجمعنا
حلمي عجوز .. يجوز
ولو ما بقا فيه غير طعنه
دروبي ظلام
وما عاد يفيدني كثر الكلام
واسمعك تسألين .. ليه ضيعنا الحلم ؟
والتفت أناظر عيونك ..
واهمس وما ودي انك تسمعين
الحلم .. كان بعيونك
وبعد غدرك انقلب لعنه
حلمي عجوز .. يجوز
عصفور بجناح مكسور .. وش يهم
واسمعك تهمسين ..
كل جرح ولا بد انه يلتئم
وارجع اناظر عيونك .. وابتسم
واهمس .. بس ودي لو انك تسمعين
جناحه يمكن يلتئم .. بس
تخيلي عصفور له جنحان
ما يحد نظرته زمان ولا مكان
يفرد جناحه بالسما .. ويطير
ثم يطير .. ليما يصير ريشه مزن
ودمعه مطر .. وارجع اناظر عيونك
واشوفك تضحكين .. واظنك ما تلمحين
بطرف عيني حزن .. واظنك تجهلين
إن العصافير ما شكت جرح الجناح
لكن شكت جرح الغدر
حلمي عجوز .. يجوز
بس بعيونك أثر ..
لليل .. وافراح .. وشعر
وشجن ..
سكن باطراف حلمي
حلمي عجوز .. يجوز
يموت الحلم .. وافضل اناظر عيونك
واسمعك .. حبيبي لا ترتعد
لو مات حلمك .. ابعطيك عيني وطن
حلمي عجوز .. يجوز
بس تراني بشيله بقلبي .. مع نظرة عيونك
وابتعد ..
وابتعد ..
وارسم تلوين الخيانة ..
ادري انها بتموت قهر هالرسمة من تلوين بشرية قاسية
لكن برسمها فنون غدرك صدقيني بتعيش ..
